「媽媽，我係點o黎o架？」小雞睜大眼睛問雞媽媽。

「你咪由蛋裏面孵出o黎o架囉～」慈祥的雞媽媽道。

「咁隻蛋又由邊度o黎o架？」小雞再問。

「咪由我生出o黎o架囉～」雞媽媽耐心地回應小雞的好奇心「而媽媽亦都係蛋裏面走出o黎o架，其實追尋源頭，我地都係由神製造出o黎o架～」

「咁神住o向邊度o架？」小雞又問。

「神住o向天堂o架囉，雞到死左之後就會上天堂o架啦，到時會有天使o黎接我地o架～」雞媽媽道。

「咁天使係點o既樣o架？」小雞好奇。

「天使呀．．．全身淺藍色，有一雙黑色的手，頭上有一頂帽，佢地好神秘o架，會帶上口罩唔比人見到佢地個樣」雞媽媽繪影繪聲地解釋。

「咁人類死左係咪都係上天堂o架？」小雞又問。

「人類死左會落地府。」雞媽媽冷冷地說。

「點解o既？」小雞好奇。

「佢地鍾意人雞分隔o丫嘛～」雞媽媽說得有點晦氣。

「咁我地咪以後都見唔到鳳大姐囉，鳳大姐好鍚我o架！」小雞急得快哭了。

「．．．鳳大姐是好人，會同我地一齊上天堂的．．．」雞媽媽嘆氣。

「好o野！咁天堂o向邊o架？」小雞破涕為笑。

「天堂o向天空上面好高好高o既地方囉」雞媽媽指著天空。

「咁我大個左係咪都可以飛上天堂o架？」小雞拍拍翼表現得很雀躍。

「傻仔，我地雞係飛唔起o架」雞媽媽輕拍小雞的頭。

「點解呀？我地都有翼喎，我想好似麻雀佢地咁周圍飛呀」小雞心有不甘。

「乖仔，我都好想你可以飛，最好有咁遠飛咁遠，有咁高飛咁高．．．」雞媽媽望著天空，悽然含淚．．．

null