陳律師在被正式委任為「婚姻監禮人」後，很快就接到第一單生意，做一對新人的「外賣」見證律師。

「婚禮地點係．．．沙田火炭坳背灣街華衛工業中心 18 樓吾信貿易公司．．．門口？」陳律師拿著文件側著頭大惑不解。

「仲要係星期五一點鐘？平日o既 lunch time？嘩．．．唔係諗住結婚都唔請假，諗住食 lunch 果陣出o黎行完禮就繼續開工，到收工至去酒樓擺酒下話？」陳律師找秘書覆核一次，確實無誤。

「嘿！而家ｄ人都古古怪怪．．．唉，是但啦，有生意做，話之你o向和合石行禮o丫～」陳律師聳聳肩繼續工作。

婚禮當日，新郎新娘一行人與陳律師都齊集上述地點準備舉行結婚儀式。工業中心比舊式工廠大廈新淨，但又不同於尖沙咀或中環等地的高級商廈般，升降機門一打開就是某公司的接待處，而是一條長長的走廊，幾間小公司就分佈於走廊兩旁，而很多舖位更是長期關閘的貨倉。

大部份人都一臉狐疑，議論紛紛，新郎哥也是面有難色，唯獨新娘子一副喜孜孜的樣子。

「係呢度啦，就o向呢間公司門口隔離就得，一點鐘就正式開始啦。」新娘子嚴如婚禮最高話事人。

時間到，陳律師背向著那公司向一對新人宣讀聲明。「快快趣趣搞掂個古怪婚禮佢啦」陳律師心中暗暗嘀咕。

「左治先生，你是否願意娶胡桃小姐為合法妻子？」「我願意～」

「胡桃小姐，你是否願意嫁左治先生為合法丈夫？」「．．．．．．」

「胡桃小姐？」陳律師奇怪新娘子沒有回答反而「頭岳岳」，不斷窺探這間公司的玻璃門入面的情況，好像在等些甚麼。

「係，律師你再問一次o丫唔該～」忽然新娘子煞有介事地將注意力放回來。

「胡桃小姐，你是否願意嫁左治先生為合法丈夫？」「我～願～意～～～～～！！」

陳律師皺著眉頭暗忖：「食左爽浪咩，嗌到咁大聲．．．」及後陳律師從新娘子「得戚」的視線發現他身後的這個公司的門口站著一個面色十分難看的女人。

「老～公～我地交換戒指啦～」新娘子以極其誇張的聲線和動作催促新郎交換結婚戒指，新郎慌慌亂亂地完成儀式。

「你使唔使去到咁盡呀？」站在門口的那女人叉著腰對著新娘子厲聲道。

「我就係要咁盡，我就係要話比你知，阿陳水小姐，我胡桃至係左治o既唯一一個女人！你唔好再癡心妄想啦！」新娘子發出有點猙獰的勝利宣言。

那女人咬著唇悻悻然望著新郎，新郎欲言又止，狀甚為難，眼神流露出乞求諒解之意。

「喂，你仲唔宣佈禮成？」新娘催促已經目定口呆的陳律師趕快完成儀式。

「我．．．我現在宣佈你倆人正式結成合法夫妻～禮成！」陳律師流著一大把汗。

「我地走～！」新娘子拉著新郎離去，新郎回望那女人，以口形道歉，更趁新娘子不留意時以手勢作打電話狀表示再聯絡。

熟知新郎情史的友人細細聲問新郎：「喂，左治，乜搞成咁呀？以後點處理？」

新郎氣定神閒地說：「無問題o丫～其實我而家就好似中美台關係咁o者，阿桃要我承認佢至係唯一一個老婆，咪結婚囉，咪大大聲聲同親戚朋友交待晒囉，佢要個采o者，但我都可以有「紅顏知己」o既o者，就好似美國佬o既台灣關係法咁，人地話治大國如烹小鮮，我就話搞國際政治就等如處理男女關係，有時呃下呢個，有時又氹下果個，維持住呢個關係咪幾好，最重要係佢兩個都要依賴我 o丫嘛～」

全程耳聞目睹的陳律師不禁搖頭大嘆「可憐！可悲！唉，無眼睇～」